مِبَيَّض نِحاس

مِبَيَّض نِحاس 

جلابيه متحزمه ..

 والحركة مش إحساس

وسطى أنا بندول ..

مع إنى مش رقاص

لو كنت انا من دول ..

ما كنش ده حالى

 ولا عمرى كنت اشتغل ..

 مبيضاتى نحاس

 سبحانه خلق البشر ..

 تسعى شمال ويمين

 يرزق جميع الناس

 وانا باسعى فى المواعين

 ومهما سعيك زاد ..

 الرزق زى القدر

 مقسوم .. وبالموازين

 واهو ضاق عليَّ الزاد

 وصبحت م العاطلين

لما النحاس اندثر

"أنا راح زمانى هدر"

وانا اللى كنت النهار

لا أنعس .. ولا أقيِّل
كان النحاس فى الشوار 
لا خفيف ولا قليل

 رقاص فى وسط النار

 والحظ ليه ميل

 بدِّل معادن ناس

 ما عادش ليها بَرِيق

 فينه زمان النحاس

والطشت والابريق

وأنا اللى ساكن زمن

والعدة نفخة كِير

 والسعر من غير تمن

حُمرة .. وعود قصدير

 إتبدلت أحوال

 ألومونيا ويّا تيفال

 بقيت انا بطَّال

 فقير ورزقى فقير

 دى إجابه ولا سؤال

 ولا كلام فلسفة

 الدسْت لو مليان

 يكفى يا دوب مغرفة