دورية غفير
أنا الغفير اللي أخد..
دورية في طرف البلد
من قد إيه
والصمت ساكن وحدتي
وأنا اللي دايما رحلتي ..
ملهاش رفيق
وحيد ودبة خطوتي ..
فوق التراب..
فوق الطريق
ملهاش صدى
قعدت أبحلق في المدى
وعَدَلْت فوق كتفي السلاح
وصرخت صرخة في البراح
في مين هناك ؟
في مين هناك ؟
ما جانيش جواب ..
قمت ابتسمت
وقعدت أدندن غنوتى
" أمجاد يا عرب أمجاد..
في بلادنا كرام أسياد"
والبرد..
والليل..
والمكان ..
والترعة..
وشواشى النخيل ..
بُركان سكوت
لملمت فوق جسمي النحيل
البالطو بزراير نحاس
"ومنين أجيب ناس ..
لمعناة الكلام يتلوه"
وسط السكات
دعبست بإديَّ ف جيوبي ..
لقيت حاجات
راديو بيغنى السلام
راديو الغفير اللى أخد
دورية في طرف البلد
"مدد .. مدد
شدي حيلك يا بلد "
إن كان في وطنك مات شهيد
"فيه ألف غيره بيتولد"
والأقصى لو راقد جريح
ده يبقى عارَك يا ولد
والراديو بيغنى السلام
"بالسلام احنا بادينا .. بالسلام "
ردت الدنيا علينا .. بالكلام
طبَّع العلاقات ونام
دعبست بإديَّ في جيوبي
لقيت حاجات
في بطاقة مكرمشة
قمت خبيت البطاقة
وفتحت أفكاري الهزيلة
بألف طاقة
حطين ..
وبدر..
وكام شهيد
وطفل في عنيه
البراءة..
والجراءة ..
هي دى أجمل بطاقة
دعبست بإديَّ فى جيوبي
لقيت حاجات
وختم معدن محترم
ختمت بيه كل الكلام
واحسن ختام
إن فاضل في الجيوب
ظرفين لزوم البندقية والكفاح
ومعايا فوق كتفي السلاح
واحسن ختام ..
إن فاضل ع الصباح
ساعتين و أنهى بالعدد
دورية في طرف البلد
ليست هناك تعليقات:
إرسال تعليق