على طرف المكان .. في مكان
أنا موجود
وليّا وجود
لكن بره الزمان .. بزمان
و أقول دا لمين ؟
و أنا وحدي
ومن غير حد
غير الموت
يصب البرد في الشرايين
ويمسح لونهم الوردي
على طرف المكان وحدي
و إيه يجدي ؟
مع الدنيا دى غير الخير
نطوّع بيه الحياة تنصَاع
و إيه يجدي ؟
لو الخير ضاع
لو الخير مات
حِدَاد .. ح يغير الأوضاع
ويفضل لينا صمت.. سكات
وييجي منين ؟
غُنا الحرية
لو صوتي تملّي نحيب
على اللي راح ومتلتم
مغمى كل أحلامي
كأني غريب
و مين في الدنيا دى مرتاح ؟
وأنا اللي مقضي أيامي
ألِف الوقت في الأكفان
ولِبْسي هدمة اللي مات
و صوتي نواح
وساكن جوه منى هوان
مكفيني ..وباقي كمان
يكفّيني عشر مرات
كأنه ويّا تكويني
نشَع في جدار
و إيه ممكن يعزينى؟
ده هُمه يومين
و بنعيشهم
و روح تخرج
تلاقى براح
أنا العايش ف وسط الموت
منين ألقي هنا الأفراح ؟
ليست هناك تعليقات:
إرسال تعليق