الجمعة، 22 أبريل 2011
صبي قهوجى
صبي قهوجي
على الطباشيرة انا عايش
حياه ساده
ما ليش ماركه
ومن غير وش
ومن غير وش
تقول لي سك عـ المطلوب
وماله .. أسُك
مدام الدنيا بالمقلوب
وحتى حسابي ..مش محسوب
قـُشاط مغلوب..
في خانة اليك
وزهري خفيف
أنا الحريف
في دور بيعك ..بزيادة
يا دنيا ناصبه رمَّاله
يا سكر بره أيامي
وعماله .. تقلـِّبني ..
أدُور فـ المُلك ..يا ساده
وعماله ..
في راسي تدك
وغلاية ..
تصب شقايا
شاي بوسطه ..
وشاي ميزه
وشايفـْــني ..
كده وتلـُك
زبون خربان
وسارق كام جنيه مـ البـُك
وجاي تلعب على المشاريب
زبون خرمان
بحالـُه ما يسوى تعميره
يا دوب ولا يسوى تلقميه
وعامل بيه
وكل كلامه ..فى الواقع
وأبصر إيه
وفى جنرال وبالفطرة
بيرسم خطه للأمة
يا عيني عليه
وغيره واخد الناصية..
معاه هيمان
طلب طقطوقه من عندى
وماسك عود
بيعزف لحن طقطوقه
ده من عنده
عشان ما تعود
وغيره كتيرعامل قبطان
ناقص له الفـُلك
تقول لي سك ع المطلوب
يا رتنى...أسك
شيال
شيّال
أنا
شايلك .. وطارحانى
وابات
أجبر أنا فـ كسرك
وده
المقسوم
يا قاسماني
وطارحه
مقامي
زي الصفر
مش أكتر
بداية
حسبه ..وحكايه
ونتيجتها
مالانهايه
يا جامعاني
وجامعه
شقايا بـ رضايا ..
فـ دربي
يا الحياة .. دايماً
أنا القادرعلى الشيله
و داير
.. والكلام أوقات
بيقبي
مجاز ..
ومش
جايز
وحتى
إن جاز
فى
ناس مـ الراحه بتعانى
وناس
فى الدنيا شُخليله
مخبي النبض جوايا
ما بين
الضلع والتانى
وشيّال
الحمول شايل
وده
الإنجاز
وشغلى
يلزمه العافية
ومش
.. إعجاز
دى بالة
قطن فى المينا
وبالقنطار
دقيق
..وخضار
بلاط
.. وقزاز
وكله
سيان
وانا
السارح
كما
القمرى
وبكره
يشبه امبارح
كده
الرزق الحلال يمرى
وكان
الحمل جالون جاز
ودلوقتى
إسطوانة غاز
وكله
شايله فوق ضهرى
عشان
محنى كما الستـّه
في
ساعة يكِل ..
أو
يتعب
وحتى
الهمّه والجتـّه
ساعات
بتمل ..
أو
تغـْلـَب
من
الحركه كما البندول
لو
الدنيا كانت سهله
لكان
فرع الشجر معدول
بلطجى
بلطجى
زمان
كنت زيك
وسابني
الطريق
وقلبي
القطيفة
الرقيق
البرئ
رميته
كمان
لأنه
ماجاب لي
ولا
قرش صاغ
وفتش
ضلوعي
حـ
تلقى الفراغ
وحسى
اللى ساكن
ف
عقلي الجرئ
إللى
بارد ..رخام
صحيح
إنه جاهل
أصول
العلام
ولغة
الكلام
اللى
تاكل معاك
لكن
برضه فاهم
وإنت
اللى عايش
حياتك
فـ راحه
شايفنى
باشرط
واقطع
جيوب
وداير
بابلطج
بمطوه
وطوب
وحاططنى
جوه
بلاغ
..واتهام
ولا
هيش شهامه
تشوفنى
مجرد
ببشله
وعلامه
ومجرم
وصايع
وعمري
اللى ضايع
فـ
همى وجوعي
ومش
مستساغ
أخش
المهالك
بدال
الجبان
وانتوا
السيادة
صحاب الأيافه
تقولوا
ده عايز
إعادة
صياغه
أنا
برضه عارف
كلام
فـ الثـئافة ..
وانا
ويا نفسي
مصالح ضميري..
مسلطن
دماغ
فلاح
فلاح
كتير عايشين ..
كما اللبلاب ..
وبزياده
كتير خانعين ..
حياه ساده
وفيه عيشنها بالمظبوط
.. وفيه مبسوط
برغم إن الشقا عاده
وانا سارح على غيطى
بحس كأنى فى عباده
وانا بفرش
خضار الأرض سجاده
أنا المعجون ..
بطين الارض يا ساده
أنا الــــــطيب .. كما التوته
وانا الواقــــف .. كما النخله
وانا الــمحنى .. كما الصفصاف
وانا المنساب .. كما الميه
وساجد قلبى
عمره ما خاف
على الارزاق ..يا افنديا
وراضى والرضا غطى
على الحبه
وقام نادى
على الريه
وبيدندن فى أغنيه
ولابس هدمه جلابيه
يادوب تنفع تصر الملح
أنا الصابر ..كما الصبار
فضل ونعمه ..دى ضلى
رفيقة الدرب
متصاحبه مع الدنيا
ومتصالحه مع روحها
تداوى الجرح ..لو تهمس
ربابه تغنى وقت الفرح
رقوبه للفراخ تفقس
تلم الطرح ..فى الطرحه
تدرس للعيال ..فى الدار
تجينى الجرن ..ب غدايا
تساعدنى وانا بدرس
عشان ما تريح الشقيان
تلم الهم جوايا
تصره وتاخده ف المنديل
تبات تحلب ليالى عجاف
تلون فى الليالى .. نهار
وينهار اللى عاش كسلان
وتحمى الفرن ..عز الليل
ولا تغفل ولا تنعس
تبيع البط
تكسينا بتوب وقطان
وبتحافظ على العيشه
خجلها والحياء بيشه
وهى الموجه والدفه
وهى الشط
وتوهمنى
كأنى عمدة الناحيه
وإنى فارس الفرسان
وابو زيد الهلالى كمان
وعنتر فى الحكاوى زمان
وفاضل يبقي عندى حصان
كتير عايشين
كما اللبلاب
وبزياده
كتير خانعين
حياه ساده
وفيه عيشنها بالمظبوط
ده فيه مبسوط
برغم إن الشقا عاده
مراكبي
مراكبي
والضلوع مكشوفة ديماً
زيها ضلوع القوارب
قلت أغنى
رغم إني
زى طير البحر ..سارح
والجناح معرفش هدنه
واما حس الهم طافح
قام غطس يغسل همومه
عمر مره الموج ما هادن
رزقى حسنه ..
ويوم بيومه
وببساطه الناس معادن
اللى مانع خير
..منع
واللى جازع خوف ..جزع
بس عمرى ما كنت منهم
طول حياتى مقضى حالى
وف ضميرى
وف خيالى
الشقى ..وراضى بحالي
شمس بتلون ملامحي
أو شتا وبرد الليالى
م العرق بهتت هدومى
قلت ابحر يم فرحى
قلت اهرب من همومي
زى طير هاجر مواكب
أسبق الشمس .. النهار
و أرمى هلبي
مره واكسر الانكسار
والضلوع مكشوفة ديماً
زيها ضلوع القوارب
والضلوع مكشوفة ديماًً
زيها ضلوع القوارب
قلت أغنى
رغم إني
زى طير البحر ..سارح
والجناح معرفش هدنه
واما حس الهم طافح
قام غطس يغسل همومه
عمر مره الموج ما هادن
رزقى حسنه ..
ويوم بيومه
وببساطه الناس معادن
اللى مانع خير ..منع
واللى جازع خوف ..جزع
بس عمرى ما كنت منهم
طول حياتى مقضى حالى
وف ضميرى
وف خيالى
الشقى ..وراضى بحالي
شمس بتلون ملامحي
أو شتا وبرد الليالى
م العرق بهتت هدومى
قلت ابحر يم فرحى
قلت اهرب من همومي
زى طير هاجر مواكب
أسبق الشمس .. النهار
و أرمى هلبي
مره واكسر الانكسار
والضلوع مكشوفة ديماً
زيها ضلوع القوارب
خولي أنفار
خولي أنفار
تحت حد الصفر سالب
والزيادة في السوالب
مش زيادة
الزيادة في السوالب
تبقى ريِّس ع الغلابة
تبقى خولي ولك سيادة
والنفر راكع قصادك
وانت منقوع قبل منه
وفوق قفانا
شمس ما بتعرف هوادة
تحفر الخط في جباهنا
مين ح يجمع
اللُّطَع والهَم غيرنا
وانتبهنا
لما قطر الضُهر عدَّى
قمنا نِتْغدى .. ونرجع
جمعتنا حته ضلة
جبنة حادقة
وشاي .. ورَكْية
قلنا نحلم
حلم وَاعِر
ومين بيحلم حلم من ده ؟
يا سلام لو أبقي عمدة
كنت ألغي القطن خالص
كنت اخلِّى
كل يوم زي النهار ده
يوم خميس
هوه ده يوم الطبيخ
كنت اخلي ابني عويس
أكبر غفير
ويبقى عمدة بعد منى
حتى شرعاً ده الوريث
وانزل المولد وأجيب
باكوين معسل م الكبير
يا سلام لو أبقي عمدة
كنت ألغي أي بيع
للقطاع .. أو للقطيع
والغلابة اللي ف بلدنا
القراية للجميع
والسلام هوه الخيار
مش مهم
إن كنت حافي أو جعان
تدوب هدومك أو تضيع
أو إيه يبان
المهم إن السلام هوه الخيار
والخيار هوه القرار
لو مخرَّط جنب سَلَطَة
يبقي جار
أو مخلل ويَّا شطة
يبقي نار
يا سلام لو أبقي عمدة
كنت أجيب لي ..
باب خشب بَدَل الجِرِيد
وافتح لي دفتر في البريد
وامشي قدام المواكب
زي ما كيفي يـِرِيد
بس عندى مشكلة
إنى حاسس إن انا
مش ح ابقي عمدة
غير كده
أوغير هنا
الاشتراك في:
الرسائل (Atom)
