عشْماوي

عشْماوي   

مغطي الصمت بالشارب

كثيف جداًَ

بقى لي زمان ..

 وبزيادة

ملامحي حادة يا سادة

لأني في شغلتي شارب ..

ملوحة قسوة التنفيذ

ودا البادي في نظراتي

تصب الخوف على المذنب

ودي العادة

وصلي معايا ع الهادي..

يموت الجاني .. دى ولادَة ..

لنور الحق ..

يعنى حياة

فعمري قلبي مرة ما رق

أكتِّف بالحزام الإيد

و أغمِّي العين

بدون شفقة ولا تنهيد

وأنهي شغلتي دايماً

بحمدي لربنا الباري

و ليه دايماً كدا جارى ..

في حين ما يشوفني يتشاءم ؟

صحيح أشبه لضلفة باب

لكني رقيق

يمين الله ومش كداب

ولا في قولي  بَتْلائم

أنا ما اقدرشى أأذى الطير

ولا النبتة

أنا في شغلتي حتى ..

باحب السرعة في التنفيذ

ألِف الحبل وأفتح باب وطبلية

في وقت وَجِيز

كما البستاني في جنينة

بأقص الفرع لو مايل

و ليه في الدنيا مش طايل

أكون حتى علي هامش ..

سطور الود ويَّاكم ؟

ف إيَّاكم

تقولوا قلبه دا..إسود

كما هدومه

وعشماوى دا من يومه

بيفرح لما يتحول

ملف قضية ع المفتي

أنا تمتمت في الأول

مغطى الصمت بالشارب

وبزيادة