خولي أنفار
تحت حد الصفر سالب
والزيادة في السوالب
مش زيادة
الزيادة في السوالب
تبقى ريِّس ع الغلابة
تبقى خولي ولك سيادة
والنفر راكع قصادك
وانت منقوع قبل منه
وفوق قفانا
شمس ما بتعرف هوادة
تحفر الخط في جباهنا
مين ح يجمع
اللُّطَع والهَم غيرنا
وانتبهنا
لما قطر الضُهر عدَّى
قمنا نِتْغدى .. ونرجع
جمعتنا حته ضلة
جبنة حادقة
وشاي .. ورَكْية
قلنا نحلم
حلم وَاعِر
ومين بيحلم حلم من ده ؟
يا سلام لو أبقي عمدة
كنت ألغي القطن خالص
كنت اخلِّى
كل يوم زي النهار ده
يوم خميس
هوه ده يوم الطبيخ
كنت اخلي ابني عويس
أكبر غفير
ويبقى عمدة بعد منى
حتى شرعاً ده الوريث
وانزل المولد وأجيب
باكوين معسل م الكبير
يا سلام لو أبقي عمدة
كنت ألغي أي بيع
للقطاع .. أو للقطيع
والغلابة اللي ف بلدنا
القراية للجميع
والسلام هوه الخيار
مش مهم
إن كنت حافي أو جعان
تدوب هدومك أو تضيع
أو إيه يبان
المهم إن السلام هوه الخيار
والخيار هوه القرار
لو مخرَّط جنب سَلَطَة
يبقي جار
أو مخلل ويَّا شطة
يبقي نار
يا سلام لو أبقي عمدة
كنت أجيب لي ..
باب خشب بَدَل الجِرِيد
وافتح لي دفتر في البريد
وامشي قدام المواكب
زي ما كيفي يـِرِيد
بس عندى مشكلة
إنى حاسس إن انا
مش ح ابقي عمدة
غير كده
أوغير هنا
ليست هناك تعليقات:
إرسال تعليق