أنا اللى شغلى محولجى
ومنسى
فى كشك تحويله
ومتدارى
أقضى الليلة متحير
فى أفكارى
وأفكارى بتتغير
وتتبعتر
وتتلملم
وفى نهارى
أضفر من ملامحى سكات
بيتكلم
يوشوش شجرة الجميز
توشوشنى بحنيّة
وتحضن كُشكى
والسنافور
تمد الضل فوق الأرض
يتهادى
ولو نادى..
جرس تليفون
برناته
أفوق من نوبة السرحان
أرد واغير الإشارات
وأقفل مزلقان سكة
وأتمدد على الدكة
وأسرح تانى فى الملكوت
يفَوَّقنى ضجيج الصوت
ولما يفوت
أغير تانى إشاراتى
واهى دنيا
وانا والوقت والمسافات
صحاب دايما
صحاب حتما
قضيب مربوط..
وساعة حيط..
وسكة حديد
نشاها بناها بالسخرة
ولد شاحب
بياخد قوته.. ويفوته..
وحاله بليد
ونفسه يحول المعنى..
لنبع الخير
ويسرى فى روحى وف روحه ..
فؤاد الطير
ولا بإشارات ولا غيره بنتحول
ودى الدنيا
ليست هناك تعليقات:
إرسال تعليق