قَصَّاص حِمير
وماشى الحال
وعال العال
باقص لكام حمار بجنيه
واجِز لكام خروف بريال
ومش بطال
في يوم الاتنين
دا يوم السوق
أروح بدري
معايا عدتي ف حِجري
وباخد جنب ع الكوبري
وطول عمري وانا غلبان
منين ما باعوز باقف
وأسير
لكنى أسير
غنم وحمير
ولقمة عيش
بتِحنى الراس
أنَجِّد بردعة م الخيش
وأفصل ع الحمار بمقاس
وباخد أجرتي بقشيش
وعمري ما قلت يا خسارة
على المقسوم
في نص اليوم
أجر غدايا م المنديل
أدندن بالرضا مواويل
" ليَّ عشم وياك يا جميل"
إن بحت بالسر تسلم
أنا حلمى بسيط وقليل
وعمري لساني ما اتكلم
ولا اتألم .. لغدر زمان
ولا باتشى .. فى يوم حَرْنان
وعمري ما اضيع
ما دُمت وديع
خروف عايش مع الخرفان
لا يعرف يقرا في الجرنان
ولا ينْصتشى للنشرة
وندوه فيها ييجى عشرة
عن الوحده جيران بجيران
وانا مالى
ولو في الصحرا قام فيضان
أنا في حالي
أنا همي يا افنديا
أجيب اللقمة لعيالى
ليست هناك تعليقات:
إرسال تعليق