عرِّيف كُتَّاب

عرِّيف كُتَّاب 

الإيمان .. والفكر زان ..

النفس والروح .. اتزان

وتقوى .. تقدر ع الزمان

وهادينا

مهيمن .. سبب الأسباب

وخالق كونه ده بحساب

 وانا حسابي .. مِسانِيه

في ضم الغلة كل حصاد

ولمّا تِحْفَظ الأولاد 

في كُّتّابي ..

 يادوبك  خُص

وفرْشُه حصير كده ع القد

وفيه الفَلكَة و الخرازان

عشان اللهو.. زي اللص

 بيسرق منا وقت الجد

و نتململ إذا عدي ..

 فرح ومعاه غُنا و مزمار

 ويتكوّر .. في ليلنا نهار

وصلي ع النبي المختار

كريم المولي

 لمّا يقسم الأرزاق

وانا ورزقي ..

في كل خميس .. 

برحمة ونور

ولما الناس توفِّي نُدُور

فتة ولحمة في الخَتْمة

ودعْوتنا  سُبُوع  وطهور

 برقوة تنَجِّي م المستور

ونفحة للعريس بحجاب ..

يفُك الرَّبط ..

ويفادي من المحظور

وفى المولد ..

  أنا المنشد .. كده بصحيح

كفيف ..لابس عمامة فصيح

بيشرح سورة الرحمن

من بعد ما رفع السما ..

ووضع الميزان 

  وف سورة تانية فيه قًَسَم ..

للمولى بسطور القلم

إكتب علي لوح إردواز

و احفظ كلامك يحفظك

 الكلمة زى المطرقة ..

والناس قزاز